धपाधप पाय आपटत एक लेकरू घरी आलं

धपाधप पाय आपटत एक लेकरू घरी आलं

वस्तूंची फेकाफेकी करत घरामध्ये गेलं

तिन्ही सांजची वेळ रात्र झाली नव्हती

आई अशीच देवा समोर दिवा लावित होती

जगासमोर जे चाललं नव्हतं ते घरामध्ये मात्र चाललं

बाहेर जे बोलता येत नव्हतं ते लेकरू आई समोर बोललं

म्हणालं खोटारडी आहेस तू आई

खोट्या मार्गावर चाललीस

आजपर्यंत तू माझ्याशी खोटंच बोललीस

आशिर्वाद देताना काय म्हणतेस?

की माझं काहीच अडणार नाही

आणि माझ्या बाबतीत कधीच काही वाईट मुळी घडणार नाही

आई पासून काय लपतंय तिच्या लक्षात आलं

तिने बाळाला घोटभर पाणी प्यायला दिलं

हुंदक्यामधून वाट काढत पाणी पोटात गेलं

आई म्हणाली आता सांग तुला काय झालं?

तो म्हणाला लोक आई विचित्र झालेत फार

सतत सगळे माझ्यावरती खाऊन असतात खार

त्यांच्या त्या अशांत अस्वस्थ नजरा मला कळतात

जाणवतं मला माझ्यावरती ते खूप खूप जळतात

बरं माझ्या विषयी माझ्या माघारी बोलतात लोकांजवळ

मी पुढे जातोय ना माझा माझा का पोटात यांच्या कळ?

बरं वाईट याचं वाटतं कि या वाईट लोकांचा एक संघ झालाय

आणि मी वाईट वागत नसून यांनी मला बाजूला केलाय

आई म्हणाली बाळा तुला माझा प्रश्नच नाही कळला

मी तुला काय झालं म्हणाले तू त्यांचा त्रास सांगितला

सोडून दे ना तुझ्यावरती ते रुसतायत का हसतायत?

कारण तुला पूर्ण करायची स्वप्नही तुझ्याच डोळ्यांना दिसतायत

त्यामुळे तुझ्या अपयशाची लोक पाहतायत

ती सगळी स्वप्ने खोटी कर

तुझ्या अपयशाची लोक पाहतायत

ती सगळी स्वप्ने खोटी कर

दुसऱ्यांची रेघ पुसण्यापेक्षा तू स्वतःची मोठी कर

आणि हे केलंस तर तुझं खरंच काही अडणार नाही

आणि आई आजही तेच म्हणेल माझ्या बाळाचं वाईट काही घडणार नाही

आईच्या तोंडी देवाचा साक्षात्कार घडला

आणि तिने लावलेल्या दिव्याचा लख्ख प्रकाश पडला

तिने लावलेल्या दिव्याचा लख्ख प्रकाश पडला